السبت، 22 أغسطس 2015

عايز اشترى بوكسات سوفت وير ومحتار. تنصحونى أشترى اية ؟ الجزء الاول

السلام عليكم ورحمة الله وبركاتة 

اهلا وسهلا بكل السوفتجية فى مدونة جوكر سوفت 
انهاردة هنكمل مع كل السوفتجية محاضرة جديدة من محاضرات ودروس #كلام_سوفتجية
واللى بنتكلم فيها عن مواضيع مختلفة كتير تخص السوفتجية 
سواء مواضيع عامة او مواضيع تقنية تهم كل سوفتجى مثل موضوعنا هذا
==================================================================
فى شباب كتير بعتت لنا على الخاص وعلى الجروب ورسائل صفحات الفيس بوك
بتسأل عن بعض المواضيع المهمة لكل سوفتجى ومن ضمن الاسئلة دى
-انا شغال سوفت وير بس الدنيا مش واضحة معايا فى الاول لان الاجهزة اعدادها كتيرة جدأ وكمان الموديلات فى زيادة مستمرة وكل فئة من الموديلات دى ليها شغلها وبوكسات السوفت وير الخاصة بيها  .تنصحونى أشترى بوكسات اية ؟
وشباب تانية بتسأل عن بوكسات السوفت وير وانا هحاول ابسط السؤأل
- فئات الاجهزة كتيرة وليكن اجهزة سامسونج مثلا .. ليها اكتر من بوكس .. تنصحونى أشترى اية علشان أعرف أشتغل كويس
وكمان يكون السعر كويس لان الماديات محدودة والبوكسات كتير ؟
واحنا هنا فى مدونة جوكر سوفت هنحاول نجاوب على الاسئلة دى
 من وجهة نظرنا المتواضعة
وقبل ما نبدأ فى الرد عن الاسئلة خلونا نتكلم عن الشباب
 اللى داخلين مجال السوفت وير جديد 
وبيشتغلوا على برامج فرى او برامج داون لودر مثل الاودين لاجهزة سامسونج جلاكسى وبرامج تفليش الاجهزة الكوبى
ذات المعالجات MT65XX سواء SP-Flash-Tool اوالايتونز فى التعامل مع اجهزة الايفون وبرامج Nokia Car Suite
للتعامل مع اجهزة نوكيا كمثال


وبنحب نقولهم لو بتحب المجال هتقدر تبدع فية وتأخد خبرة كويسة جدأ طول ما انت بتتابع كل الجديد وبتشوف شروحات وتركات لعمليات السوفت وير المختلفة سواء تفليش او اصلاح او روت وريكفرى وريستور وجيلبريك لاجهزة المحمول المختلفة
واحنا بنحاول نساعد ونقدم شروحات كتير للمبتدئين وكمان للسوفتجية اللى مش عندهم بوكسات سوفت وير 
لكن علشان تتميز وتكون محترف لازم يكون عندك بوكسات سوفت وير ...
طب لية ؟

-أولا - لان بوكسات السوفت وير مبرمجة للتعامل مع قطع الهارد وير الداخلية للموبايل بطريقة سريعة وأمنة
مثل عمليات اصلاح السيريال والبيسباند imei Null وعمليات فك الشفرات الدولية وحساب اكواد الشفرة 
وايضا كتابة بعض الملفات الضرورية مثل ملفات Cert و EFS و QCN لاجهزة سامسونج كمثال
ولا نغفل البوكسات الخاصة بالجيتاج واصلاح مناطق البوت والتى لن تستطيع العمل بدونها إلا لبعض الموديلات القليلة
المدعومة مجانا على برامج مجانية لاصلاح عمليات البوت


ثانيا- بوكسات السوفت وير حائط أمان بالنسبة لك ... إزاى يعنى ؟
هقولك مثلا لو جالك جهاز وليكن جلاكسى S3 وفلشتة على برنامج الاودين وبعد التفليش مش جايب شبكة او مكالمة طوارئ فقط
لو محترف ممكن الموضوع ياخد منك وقت ومجهود كتير علشان تحل المشكلة ولكن مش دايما هتتحل
لكن ممكن المشكلة تتحل فى اقل من دقيقتين لو عندك بوكس متخصص للتعامل مع اجهزة سامسونج مثل Z3X او Octopus
طيب دلوقتى عرفنا اهمية تواجد بوكسات السوفت وير لكل سوفتجى نرجع بقا ونجاوب على اسئلة الاعضاء
وكان السؤال الاول أشترى بوكسات اية ؟
وعلشان اجاوبك على السئوال دة هنعتبر انك مبتدئ فى مجال السوفت وير
ومش عندك  بوكسات 
وكمان مش معاك ماديات كفاية تقدر تجيب بيها بوكسات كتير 
وهنقسم الاجابة حسب فئات الاجهزة المشهورة فى السوق 

وهنبدأ ببوكسات أجهزة سامسونج جلاكسى

بعد الانتشار السريع لاجهزة سامسونج جلاكسى فى الاسواق اصبح يقابلة زيادة كبيرة من بوكسات السوفت وير 
القادرة على التعامل مع عمليات السوفت وير المختلفة لهذة الاجهزة سواء فك شفرات او اصلاح او تفليش
ومنها على سبيل المثال لا الحصر
Octopus Box
Z3X Box
-AsanSam Dongle
-BST Dongle
-SPT-Box
-NCK-Box
-Ns-Pro Box
بالاضافة الى البوكسات الخاصة بعمليات الجيتاج واصلاح البوت
-z3x jtag box
-Riff Box
 -octoplus jtag

انت كدة حيرتنى وتوهتنى ومش عارف اشترى اية لان البوكسات كتير
 

متستعجلش وكمل معايا الموضوع للاخر لاننا عايزين نساعدك ونحطك على اول الطريق
- كبداية لو عايز تشترى بوكسات لاجهزة سامسونج مش شرط تشترى كل البوكسات اللى قولنا عليها 
لان كل بوكس لة ما يميزة فى بعض العمليات الضرورية عن غيرة ولكن فى الاغلب تقدر تشتغل 
على بوكس واحد او اتنين فقط من اللى قولنا عليهم فوق ....أزاى؟


-يعنى ممكن تشترى Z3X-Box كبداية بجانب البرامج المجانية مثل الاودين وغيرها ودة هيكون لشغل فك الشفرات
وحل مشكلات السيريال والبيسباند وغيرها من العمليات 
او ممكن تشترى بوكس Octopus وبرضو هيقوم معاك بنفس المهمة .
.بس خلى بالك 
البوكسين بيشتغلوا Samsung و LG يعنى ممكن تشتريهم سامسونج فقط او تأكتفهم علشان يشتغلوا الاتنين 
ولك حرية الاختيار فى ذلك على حسب الماديات المتوفرة معاك او على حسب جو الشغل فى مكانك
يعنى لو المكان اللى انت فية السامسونج شغال اكتر فممكن تشترى واحد منهم وتأكتفة سامسونج بس كبداية
وبعد كدة ممكن تأكتفة LG لو شغل اجهزة LG بقا كتير عندك 

طب لية البوكسين دول بالذات اللى ممكن أبدأ بواحد فيهم ؟

- لانهم يعتبروا من اقوى البوكسات الموجودة فى السوق وكمان فى تحديث مستمر واضافة موديلات جديدة
باستمرار وكمان التعامل مع نسخ الاندرويد الجديدة مثل Lollipop وقريبا marshmallow
 وبعد فترة تقدر تكمل بوكساتك وتضيف كمان بوكس جديد لما احوالك تسمح سواء 
هتجمع الاتنين مع بعض او هتشترى بوكس او دونجل جديد 
مثل BST او NCK Samsung
او ممكن تضيف بوكس جيتاج زى Riff بوكس مثلا 
وبكدة تقدر تتعامل مع اجهزة الاندرويد اللى هتدخلك وتشتغل بالامكانيات الموجودة عندك ومع الوقت تقدر
تحدث وتشترى بوكسات تانية لو الحالة المادية تسمح 
وفى نهاية الجزء الخاص ببوكسات سامسونج انصح المبتدئين او الراغبين فى شراء بوكسات خاصة
لاجهزة سامسونج اندرويد باحد هذة البوكسات Z3X-Box او Octopus -Box
او دونجل BST .. وهذة كبداية ولكم حرية الاختيار بعد البحث وقرائة معلومات كاملة عن البوكس اللى هتشترية
سواء على الموقع الرسمى للبوكس او على القسم الخاص بالبوكس فى الهوستينج 
ومتنساش تجمع معلومات عن البوكس اللى هتشترية سواء الاجهزة المدعومة او العمليات الحصرية فى حل المشكلات 

بوكسات اجهزة نوكيا 


طبعا كلنا عارفين ان اجهزة نوكيا خرجت برة المنافسة بعد انتشار الاندرويد 
لكن لسة بتحاول تنافس باجهزة مختلفة سواء بانظمة ويندوز فون بعد سيطرة مايكروسوفت على الشركة
او اجهزتها التى تعمل بنظام الاندرويد مثل Nokia X & XL
ودة ميمنعش انها فئة موجودة مع ناس كتير ولازم تتعامل معها 
وفى اكتر من بوكس بيتعاملوا مع اجهزة نوكيا المختلفة ومنها اللى انتهى عصرة وتوقف تحديثة مثل 
Jaf-Box 
- MT-Box
MX-Key-BOX
ومنها اللى لسة شغال على اجهزة كثير مثل HWK - Box
ودة كان من افضل البوكسات للتعامل مع اجهزة نوكيا لانة داعم اجهزة كتير جدأ سواء قديم او جديد
وكل السوفتجية اشتغلوا علية وكمان كان داعم اجهزة تانية غير نوكيا زى سامسونج والجى وسونى اريكسون وشارب
لكن للاسف فى اجهزة كتير مش مدعومة علية واغلبيتها اجهزة حديثة ومنتشرة فى السوق
لكن لو هنتكلم عن البوكسات اللى بتقدر تتعامل مع الاجهزة الحديثة مثل انظمة اللوميا والويندوز فون
هنزكر اهم بوكسين 
ATF-BOX او بوكس التربو فلاشر
وكمان دونجل infinty best dongle
ولو عايز تشترى بوكسات لاجهزة نوكيا فانصحك أما بدونجل البيست لانة بيدعم موديلات نوكيا الحديثة 
بالاضافة لاجهزة نوكيا ذات المعالج MTK مثل 220-225-108 وغيرها من هذة الفئة
وهتقدر تتعامل مع كل اجهزة نوكيا سواء تفليش او فك رموز حماية او اصلاح سيريال لبعض الاجهزة
ولكن المشكلة انك هتشتغل بكابل ال USB فقط لان دة دونجل مش بوكس يعنى مفيش مخرج RJ
وعلشان تقدر تستخدم كابلات RJ لازم تواجد بوكس اخر علشان يشتغل مخرج كوم للدونجل
وليكن مثلا لو عندك بوكس HWK وساعتها تقدر تشتغل بكابل USB وكابلات ال RJ
او تقدر تشترى بوكس التربو ATF وهو بوكس قوى للتعامل مع اجهزة نوكيا باصدراتها
وكمان تقدر تأكتفة علشان تشتغل بية جيتاج للاجهزة اللى فقدت بوت او فصلت على السوفت

- انصحك بدونجل البيست كبداية ودة لانة داعم موديلات كتير وسعرة كويس او بوكس التربو

وزى ما قولنا تقدر بعدها تشترى اى بوكس تانى او تجمع بين البوكسين مع بعض

خاتمة الموضوع

إحنا هنا مش بنتكلم عن بوكسات السوفت وير من منظور علمى ومميزات واضافات كل بوكس
 ولكن بنحاول نساعد السوفتجية انهم ازاى يقدروا يبدأوا ببوكس واحد لكل فئة
وكمان اهمية كل بوكس بالنسبة للتعامل مع فئات الاجهزة اللى شرحناها 
وأن شاء الله فى الجزء التانى من الموضوع هنشرح باقى البوكسات اللى ممكن تبدأ بيها
مع انواع الاجهزة الاخرى مثل HTC - Alcatel-وبوكسات الاجهزة الصينى 
وهنخلى الموضوع على اكثر من جزء علشان نقدر نوصل المعلومة كويس بالتفصيل
وفى النهاية بنقولك متزعلش وأبدأ ببوكس واحد ومع تعبك ومجهودك بعد فترة 
هتقدر تشترى بوكسات كتير 
ولو فى اى استفسار او اضافة ممكن تكتبهالنا فى التعليقات او الجروب 
وان شاء الله هنحاول نرد على الجميع ونستفاد من مقترحاتكوا وأرائكوا 

إقرا ايضا : عايز اشترى بوكسات سوفت وير ومحتار. تنصحونى أشترى اية ؟ الجزء الثانى 

لو أستفدت من الشرح اشترك معانا فى قنواتنا على اليوتيوب عشان يوصلك كل جديد
وكمان تقدر تحمل تطبيق الاندرويد الخاص بالشروحات وتثبتة على موبايلك عشان تتابع كل جديد
مرسلة بواسطة في
التسميات: ,