أظبط الكلام معايا يا صاحبى عشان انا محل

المرة اللى فاتت اتكلمنا على بعض الاسباب اللى وصلت الناس
 انها تبص للسوفت وير 

عموما على انة حاجة سهلة وبتتعمل بسرعة وملهوش داعى يدفع فية تمن غالى

وللاسف معظم الاسباب (دا لو مكنتش كلها) بتحصل من ناس المفروض انهم داخل المهنة

وقطعنا فيهم شوية .(هو كتير بصراحة مش شوية )

وقولنا ان دخلاء المهنة والفلهلوية بتوع كلة من اهم الاسباب اللى خلت الزبون

يفكر ان كل عمليات السوفت وير ب5 جنية و 10 جنية 

وانهاردة يا سوفتجية هنحط على فئة تانية من الناس اللى ممكن تتعامل معاهم

هنتكلم عن صحاب المحلات اللى عايزين الشغل ببلاش إلا ربع 

وعايز يعصرك ويفضل يحك معاك فى كل حاجة حتى لو هتنزلة برامج ..

واحنا قسمناهم لاكتر من نوع حسب تعاملهم مع السوفتجية 

النوع الاول : " التـــــنــــك "

 

والنوع دة وخداة العظمة شوية وعايش فى دور مش بتاعة وفاكر انة 

لما يجيبلك شغل ..انة كدة بيعمل معاك جميلة وانت لازم ترضى 

بالسعر اللى يقولك علية ..ومفيش جهاز هتعملهولة
 إلا لما يقولك ( غالى كدة يا اخى )

ويقولك انا بجبلك شغل كتير وانا كنت بتعامل مع فلان ( اى حد ) وكان بيعملى باسعار غير كدة خالص

وتلاقية اكتر واحد مستعجل على شغلة وعايزة يخلص فى دقيقتين 

ويحب يوسعها قوى على الناس وعلى الفنيين سواء سوفت او هارد 

اة نسيت اقولكوا ان النوع دة فى الاغلب بيكون ملهوش فى مجالات الصيانة 

( سواء سوفت او هارد )

المشكلة بقا بعد ما يقرفك فصال فى الاسعار وتستحمل رخامتة وهبلة 

تلاقية بيبعتلك حسابك 50 فى 20 ...يعنى حضرتك تعملة الاجهزة يروح 

الباشا المدير مسلمها للزباين وياخد فلوسها ويظبط دفترة ويقفل يومة

وانت بقا مش مهم بعدين لما الحساب يجمع

- البرنس دة بقا حاول بقدر المستطاع مش تبقيلة حساب كبير 

يعنى اول باول تاخد فلوسك وحسابك عشان تظبط يومك انت كمان 

ولو ليك فلوس عندة وكلمتة عليها وهو بينفض يوم واتنين 

لما يبعتلك شغل تانى مترفضوش واستلمة ( وارمية فى الدرج )

ولما يتصل عليك نفضلة مرة واتنين واخرلة الشغل 

ساعتها هيحس انك بتنفضلة وهيبعتلك فلوس غصب عنة عشان 

الزباين هبلوة ..

النوع التانى : "اللى عامل مفتح "

دة بقا تبع إخونا الدخلاء اللى اتكلمتا عليهم قبل كدة ودايما عامل مفتح

وانة عارف كل حاجة ويفضل يجادل معاك فى اى حاجة

مع انة مبيعملش حاجة اصلا بس جاى الدنيا دى عشان يرخم عليك

وبيشترك مع النوع الاول فى " الحك" الكتير والفصال فى اى حاجة

وطبعا الكلمتين اللى كلهم حافظينهم " دا فلان بيعملهولى اقل من كدة "

والنوع دة برضو فى معظم الحالات ممكن يجبلك جهازين كل شهر

وفى الاغلب بيكونوا صينى او اجهزة متتعملش اصلا

- دة بقا عشان تتعامل معاة 

ولع سيجارتك و اضرب قهوتك وبص فى جهازك واشتغل

وسيبة يتكلم براحتة ولما يزهق هيدفع اللى انت عايزة

النوع التالت " البـــــرنــــس "

دة بقا برنس وتلاقية راجل بيقدر الشغل ومش بيتكلم معاك فى اسعار كتير 

مش شرط عشان بيحبك ..بس فى الاغلب بيكون بيحسبها بيزنس وانة 

بالبلدى كدة عايز ياخدك تحت جناحة عشان انت هتنفعة بعد كدة قدام

ممكن يكون لابس جهاز او مشكلة مع زبون ويجيلك عشان تقنع الزبون

وتحل الموضوع دة ..بس متزعلش لو سابك واقف مع الزبون وخلع 

عشان فى ناس فى المحل او هو رايح لناس

لان كدة دورة انتهى وجة دورك فى الواجب ..

-حاجة اخيرة بيشترك فيها كل الانواع اللى فوق دول

اجهزة العائلة الكريمة بتاعة جنابة او اى حد عايز يوجب معاة

وتلاقية كل فترة يجبلك اجهزة ويقولك دة جهاز ابن عمى ودة بتاع ابن خالى

ودة بتاع خالتى ..ودة بتاع صاحبى ..ووووووووووو

وطبعا عايزك تعملة الشغل دة ببلاش 

ألسؤال بقا ..انا مال اهلى بالموضوع دة ؟

ياعم قرايبك وحبايبك وصحابك على رأسى من فوق 

بس دول حبايبك وقرايبك انت انا مالى يعنى لو عايز تعمل معاهم واجب

اعمل من جيبك مش من جيبى لانهم يعرفوك انت وهيردوا الواجب برضو ليك انت

انا مليش دخل فى اللى بيحصل ..انا ممكن من باب الزوق اعملك جهاز او جهازين

للقرايب من الدرجة الاولى ( اب - ام - اخ - اخت)

غير دة لا .

خلاصة المقال: 

احنا بنحاول نجمع بعض الشخصيات اللى بتتعامل معاها كل يوم

وبنعرف عيوب ومميزات كل شخص وازاى نقدر نتعامل معاة

والمقال لا يقل من قيمة حد ولا يجرح فى حد لان كلنا اخوات وصحاب

بس فى مواقف وحاجات بتحصل معانا كلنا كل يوم وبنحاول نحللها

عشان نقدر نتعامل معاها صح من غير ما نزعل حد مننا

احنا اتكلمنا على اكتر من نوع من اصحاب المحلات اللى بتتعامل معاهم

ولو عندك اضافة او نوع رابع قولنا علية عشان نحط علية برضو